PARJAMBARAN DI ADAT BATAK

PARBAGI NI JAMBAR
(Pinahan Lobu-Na Marmiakmiak)

Aliangliang

Batisan

Gonting

Ihurihur

Osang

Panamboli

Rimpusu-Ateate-Butuharaja

Soit

Sombasomba

Somba

Na Marngingi

Panahui 

 

Na Margoarna

Dengke Simudurudur

Dengke Sitiotio

Dengke Sahat

Dengke Saur

RAJA DI SON, RAJA DI SI!

ANAK NI RAJA BORU NI RAJA

          Sude do halak Batak Raja. Raja  di son raja di san. Dipanghataion pe: “Amanta raja, inanta Soripada”, “Amang Rajanami"; "Hamuna Rajanami", "Boru ni Raja i, “O rajangkon…” Tung jotjot pandohan on itabege.

Sasintongna, "Ndang na diparajaraja asa raja," ala tarida do Imbo sian soarana, tartanda do Babiat sian bolangna, dohot tartanda do Gaja sian bulelena.

Sahalak raja tarida sian hatauonna mangarajai sandok dirina. (pantun jala sangap).

            Nanggo apala lima nian pangalaho na raja di halak Batak i, patuduhonsa songon angka anak dohot angka boru ni Raja, i ma:

1.     Raja di roha (margogo mangamudihon hagiot)

2.     Raja di pingkiran (margogo mangamudihon pingkiranna, marbisuk)

3.     Raja di pamerengan (Raja marpanaili)

Na tolu na parjolo on, on ma harajaon na so pala paltak tarida, ala di diri ni raja i do i..

4.    Raja di pangalaho (Raja marpangalaho)

5.      Raja di panghataion (Raja marsimangkudap)

Na dua on, paltak tarida ma on sian parange sian duru. Raja di son raja di si!

TIRUAN

Adong ma sahalak ina, ro mamboan anakhonna bajarbajar tu jolo ni amanta Sintua Lingkunganna. Dipaboa inananta i ma tu amanta sintua i, naung sai marisap anaknai di Kantin Sikola, uju pause sikola. Dipangido inanta i, asa podaan ni amanta sintua i anakna i, anggiat muba.  

“Paima ma jolo inang dua minggu tu jolo on, ro ma muse inang dohot anakmon tu son ate!” ninna amanta sintua i.

Longang do roha ni inanta i, anggo pamotoan ni inanta i, sintua na marsahala do amanta i, burju, serep, paradat jala padot. Boasa pola paimaon dua minggu nari? Boasa ndang saonari? Ninna roha ni inanta i di bagasan. Alai ala pos roha ni inanta i, jala ala holong ni rohana tu anakhonna i, dioloi nama i.

Dung dapot dua minggu, ro ma inantai dohot anakhonna i tu bagas ni amanta sintua i.  Pintor dipanghulingi amanta sintua i ma anakhon ni inanta i, dipodai denggan. Dung sun, di dok inanta i ma mauliate tu amanta sintua i. Alai sai tong dope longang rohana, beasa pola paimaon dua minggu? Gabe disungkun ma amanta sintua i, beasa ingkon pola paimaon dua minggu?

"Saleleng na dua minggu on, ndang marisap be ahu, jala nang tu jolo on pe, asa margogo ahu mamodai anakmu on,” ninna amanta sintua i. 

Ndang marisap be amanta i sahat tu sadari on. (Cerita on tiruan sian ngolu ni Mahatma Gandi)

Maol ngalut do na gabe pamodai, lumobi na gabe tiruan. (Gabe sintua pamodai na gabe tiruan: “Unang ho marisap, hape ibana sandiri parisap.”)

Mangihuthon Kamus Besar marhata Indonesia, hata “tiruan-teladan” lapatanna: sesuatu yang patut ditiru atau baik untuk dicontoh (perbuatan, kelakuan, sifat, dla).

O HOHO, HALAK HITA!

O HOHO, HALAK HITA!

Pajumpang ma na mariboto di sada Kantor Pos.

Horas ito, na marhua hamu?

Di dia halak lae? Ninna ibotona i.

I ma da ito, laho nangkin tu balian!

Ninna ibotona i, huhut diabing sibutetna.

O, na marhua nangkin halak ito?

Manongos balanjo ni beremuna,

na marsikola di Medan i do, da itongku!

O, nunga na denggan i itongku.

Nunuti hamu na mangula i asa hasea angka berengki! 

On tahe na ni abingmu on, berengku na papigahon do on?

On ma na patoluhon,

Siampudan, ito!

Halo bereee, siapa namamu?

Ninna tulang i manggalmit hurum ni berena i.

Sintauli tulang, dok boru!

Ninna mandok tu boruna i, asa dialusi.

Si Sintauli goarna.

Saonari laho tu dia ma hamu ito?

Mulak nama tu jabu.

Ninna ibotona i.

Marmobil do ahu ito, taruhononku hamu? Ninna ibotonai!

Ala hira jonok do huroha bagas ni ibotona i.

Ndang pola ito, marangkot pe hami dohot berem.

Targanggu anon langka ni ibotongku.

Ninna mangalusi.

Didadap tulang i ma kantung ni saraoarna.

Disintak ma arga lima ribu rupia.

Na bere, tuhor annon Karupuk,  ninna tu berena i.

Ro ma ibotonai, mandok: Unang ito!

Somal jala idaida annon beremi!

Dipaduahalihon tulang i ma muse manjukjukkon tu berena i.

Diulakhon ibotonai ma muse mandok: unang ito!

Somal jala idaida annon beremi!

Alai di dadap tulang i ma muse kantung ni saraoarna.

Disintak ma arga lima pulu ribu na gorsing dope!

Maradu disolothon tu tangan ni berena i.

Ndi on bere, bahen annon tu bulu potonganmu da!

Ro ma ibotonai mandok.

Bilang apa Uli sama tulang!

Terima…. ka… sihhhhh!

Ndang tartulak hamu nian ito!

Ninna mandok  tu tulang ni dakdanak i.

Molo arga lima ribu rupiah do dilehon.

Unang ito, idaida jala somal annon!

Alai molo arga lima pulu ribu lumobi arga saratus ribu.

Bilang apa sama tulang?

Mauli…a….te!

Terima….ka…sihhhhh!

O halak hita

Tarsongon i do ho hape!