SODIP PARTUANTA-TANGIANG NI NATUATUA I

Uju borhat sian huta on ma di dok Puhun (tulang) i tu ahu

Pentakoste 2

among…

beasa ndang adong di Ho

na pahatophu?

jala ndang adong na tarlat?

songon na so parduli do Ho,

sai songon na mandok:

magira ma Ahu ro!

 Magira ma Ahu ro. Tiop ma na di ho, unang adong na mambuat tumpalmi! 

(Pangungkapon 3:11)

BOTO HAMU BARITA ON, HELA MANSOPET PURO NI INANTA SIMATUANA

Nunga hutongos nomor ni tikketmi inong,

suru ma dijaha siampudanmi sian henponmi da!

Asa diprin tu parkomputer i.

Borhat sian Kuala Namu ari Jumat Pukul 13.00 WIB.

Ingkon nunga di bandara Kuala Namu ho sada jom andorang so borhat.

Inong! Ndang boi hutomu hami ho tu bandara di Jakarta.

Ai mula ulaonna be do hami nang helam.

Songon i do di Jakarta on.

Di inganan na jumonok ma ho hotomu, asa boi parmisi satongkin sian ulaon.

Molo so adong dilei,

nunga sahat ho di Jakarta Pukul 15.00 WIB pukul tolu botari.

Dung sahat ho di Bandara Cengkareng, sungkun angka petugas di bandara i,

dia bis Damri tu Rambutan.

Molo dung jumpangmu, nangkok ma ho tu bis Damri i,

unang adong angka hadanghadanganmu na tading.

Molo dung mardalan bis i,

ro do tu hundulanmi sitongkarna i manjalo ongkosmu,

dang pola arganon i, tar hira opat pulu ribu rupia do i.

Ingot, dok ma tu sitongkar ni bis Damri i,

mijur di Garuda Taman Mini ho.

Asa hutomu ho di si,

parmisi pe ahu satongkin sian parkarejoanku di Taman Mini.

Ninna sahalak boruna ma tu inongna na laho ro mandulo hela,

borunai dohot angka pahompuna.

Ninna sada halak boruna ma martalipon tu inongna di hitaan.

Sahat ma tutu inantai  di bandara Cengkareng,

jala dipanakkok Satpam ni bandara i ma inantai tu bis Damri Rambutan,

asa tuat di Garuda Taman mini inanta i.

Garuda turun! Ninna sitongkar ni bis i,

pintor hobas ma inanta i sian hudulanna laho mijur.

Holan ampe pat ni inanta i di aspal parmijuranna,

pintor ro sada halak baoa manombissa,

antar songon na manungkun. Ojek? Ojek?

Ke mana bu?

Hape nunga diemor baoadi puro ni inantai,

sian tas ni inanta i so pamotoan ni inanta i, laos lao baoadi lintun.

Dungkonsa i pintor ro ma boruna i.

Omak, ninna! Di haol ma inongna i, pola tangis nasida.

On pahompum si Pinta, ninna.

Pintor di haol pahompuna i.

Di dia hela? Ninna inongna i.

Eeee, karejo do, annon bodari pe pukul ualu asa mulak i.

Beta tu jabu ma hita, nunga parmisi ahu sian karejo,

jala si Pinta pe na huparmisihon do sian sikolana.

Marbajaj ma hita asa siat dohot tasmu on.

Laho sahat tu jabu, manggarar ongkos bajaj on,

dilehon boruna i ma arga saratus ribu.

Tidak ada uang kecil bu, ninna parbajaj i,

ala so adong ulakna hepeng metmet.

Paima jolo hubereng purongku da,

adong do ra hepeng metmet,

ninna inanta i,

huhut didadap tasna, sai disigati.

Alai ndang jumpana purona i,

ai nunga diemor baoadi nangkin.

Gabe laos lungun ma rohanasida,

tu lapolapo na di dalan i nama di tungkar.   

Sahat di jabu maos ma di sigati inanta i sude tas na i,

dohot usungan nai, sotung na sambar do tu si. Ninna roha.

Sai tarilu ma inanta i,

gabe pasidohot ma boruna dohot pahompuna i marhabot ni roha.

Jumpang pukul ualu,

ro ma helana sian parkarejoaan.

Eeee, jalang omak. Nunga sahat be omak.

Horas inang! Ninna helana i.

On dope nasida pajumpang.

Ala pintor masipanotnotan ma inanta dohot helana i.

Hira na hea hamu huida? Ninna inanta i. mandok tu helana i.

Hamu pe inang hira na hea huida,

ninna helanai mandok tu inanta simatuana i.

Ooooo, hamu do na mandok ojek, ojek nangkin kan?

Ninna mandok helana i,

Di dia inang? Antar ninna manungkun.

Di dia tahe omak Pinta parmijuranki nangkin?

Di Garuda omak! Ninna boruna i.

Ndang inang, ai di Tanjung Pariuk do au nangkin,

ninna mamorso simatuanai.

Dapot roha ni simatuanai ma,

na hela na i do nangkin mangemor purona i.
Ai ndang hea dope jumpang helana dohot simatuana i
ai ndang ditanda,
gabe disopet helana i puro ni simatuana i
  

Jempek do pat ni gabus.

Hela mancopet puro ni simatuana?

Udutna aha ma na masa? 
Tapahusorhosor be ma!

U L O S

ULOS

Di na sada ari, 
disuru amongna ma 
na marhahamaranggi 
laho mangula tu balian. 
Na so panagaman ro ma udan doras. 
Malonu ma na dua na marhahamaranggi i, 
pola sahat tu na manghitiri. 
Uuuuuuuuuuuu....
ninna ma manaon ngalina.

Manginongi ma roha 
ni inongnasida di huta. 
Na so panagaman 
ni na dua halak na marhahaanggi i, 
ro ma inongnasida mamboan sipanganaonnasida, 
dohot salin nasida.

Tarsonggot 
jala logang ma roha ni inongnasida 
mamereng anak na i, 
nunga pola marlangan anaknai 
ala ngalian. 
Pintor diampehon 
inongnasida i ma ulos 
tu abara ni anakna na dua i. 
Pintor las ma panghilalaannasida. 
Sian: Uuuuuuu.....
gabe: lassss! 
Ulossssss!

Mauliate inong! Ninna. 

Siu, siu amang gori api 
asa las panghilalaanmuna. 
Asa mangan hamu!

Ulos, bonang na ditonun gabe sada hain salembar. Di mulana, andorang so ro dope pahean (Saraoar/pitolon/selana dohot bajubaju) sian halak Eropa, Ulos gabe pahean siganup ari di halak batak. Molo sada halak baoa mamahesa digoar ma i “handehande” bagian partoru digoar “singkot” molo di simajujung digoar “talitali” manang “detar”.

Molo sada halak borua do na mamahe, molo dililithon di pamatangna sian toru sahat manutupi andora digoar “haen”, manutup tanggurung digoar “hobahoba” dipahe ma muse songon salendang digoar ma i “ampeampe”, molo na manutup simajujung digoar ma “saong”. Molo sahalak na mangompa dakdanak na manutup tanggurungna di dok ma i “hohophohop”. Haen na dipahe mangompa dakdanak i, di goar “parompa”.

Sahat tu sadari on boi dope dapotonta pamaheon i di hutanta. Tutu ndang sude ulos sai di pangke di ngolu di sagup ari.

ULOS DOHOT PAMAHENA

Godang do ragam ni ulos di halak Batak, alai holan opat do na jotjot dipangke di ulaon adat.

1.      ULOS MANGIRING (Jenis ulos parompa), pamangkena:

1.     Dipasahat tu dakdanak naimbaru sorang  
2.  Dipasahat tu posoposo/dakdanak na tardidi di gareja    (parompa)

3.    Ulos saput ni posoposo/dakdanak na monding

2.     ULOS SIBOLANG, jotjotan do on dipangke di ulaon habot ni roha, pamangkena:

1.     Ulos saput ni dolidoli/anak boru molo monding

2.   Ulos saput dohot tujung ni natunggane molo monding

3.    Ulos sihadangon di ulaon habot ni roha (marujung ngolu), hasuhuton na manghadang ulos sibolang, diampehon ma di abara parhambirang jala pinggir ni ulos dompak ruar, songon i do nang angka tutur na mandok hata pe ingkon manghadang ulos sibolang do.

3.      ULOS RAGIHOTANG (ULOS SIRARA), tung godang do namamangke ulos ragihotang on tarlumobi ma di ulaon las ni roha, pamangkena:

1.     Ulos hela

2.   Dipasahat tu na malum sian parsahiton

3.    Dipasahat tu na mangompoi jabu

4.   Sipangheon di na mangonghal holi (dipasahat hulahula tu boruna)

5.   Sipangheon di pesta unjuk

6.   Ulos holong di angka ulaon adat

7.    Dihadang di angka ulaon las ni roha

8.   Ulos saput dohot tujung ni na sarimatua, jala tondong na talup manghadang, ulos ragihotang on ma di ampehon tu abara parhambirang jala pingirna i dompak ruar.

4.     PINUSSAAN (RAGI IDUP), pamangkena:

1.     Di ulaon pesta unjuk, suhut bolon manghadang di abara parsiamun jala pinggirna dompak ruar.

2.   Dipasahat tu namalum sian parsahiton (molo dung marpahompu)

3.    Dipasahat tu na mangompoi jabu (lumobi molo mamalu ogung sabangunan)

4.   Diulaon mangonghal holi (jotjot dipasahat hulahula tu boruna)

5.   Ulos pansamot (somalna)

6.   Ulos pargomgom (ompung ni anak mangoli)

7.    Dihadanghon. (Namanghadang ulos ragi idup naeng ma nian marumur pinomat 50 taon asa sanggam idaon.

8.   Ulos saput dohot ulos sampetua ni nasaurmatua/na maulibulung.

5.     RAGAM NI ULOS NA SO POLA HEA BE DIPANGKE

Di luar ni ulos na opat ragam na ginoaran di ginjang i, adong dope ragamragam ni ulos na so pola hea be dipangke di ulaon adat ima: BINTANG MORATUR, SITOLUNTUHO, SADUM ANGKOLA (GODANG), BOLEAN, RAGI IDUP dohot SURISURI.

Molo manghadang ulos, pinggir ni ulos i ingkon dompak ruar do, jala molo manghadang ulos ingkon songonon ma parpeakna:

·        Molo di ulaon habot ni roha: abara parhambirang ma manghadang

·        Molo di ulaon las ni roha: abara parsiamun ma manghadang

                                                                                                          (Diuhal sian marragam panguhalan)