Sirup ma kopimi, unang bondut mangkukna!

Sirup ma kopimi, unang bondut mangkukna!

Na marnonang ma sada halak raja parhata dohot angka donganna. Ragamma dihatai nasida, pola do sahat manaringoti amanta si Ahok, Amanta si Jokowi, amanta si Donald Trumpp, dohot do luat Timur Tengah. Parpudi sahali dihatai nasida ma arga ni tuhor ni kopi, dohot tabo ni na mandorguk kopi.

Huhut inum hamu kopimunai, antong!

Ninna amanta raja parhata i.

Songon na hurang tabo na minum kopi on,

ninna sada halak sian nasida.

Beasa huroha?

Ninna sada halak sian donganna i muse.

Ia kopi ni raja i, di sangkir palastik,

Na di hami on,

di bagasan galas,

ia di ompung an di mangkuk. Ninna!

Dibuat amanta raja parhata i ma sangkir palastik

inganan panginumanna i.

Dibuat ma muse galas kassa

inganan panginuman ni sada halak donganna i

Parrohahon hamu ma jolo on,

ninna amanta raja parhata i

mandok sangkir dohot galas na di tanganna i.

Tutu di galas na mura argana do,

na sian palastik do inganan kopiku on.

Jala kopi ni natuatua on,

di galas na arga na margorga.

Anggo galas manang sangkir palastik,

Manang porselen na margorga

ndang pola mambahen muba dai ni kopi…

Tutu torop lapo parade galas na uli,

gabe ummarga gararon kopi na itainum.

Husungkun ma hamu,

galasnai do na ringkot di hamu,

manang isina
kopi siinumon i?

Ninna.

Songon i ma ngolunta on,

sangkir,

galas, 
mangkuk,

songon ulaula do i

laho manggohi angka na tabo di ngolunta on.

Ulaula na itapangke i,

Unang ma i, 
gabe suhatsuhat ni las rohanta.

Impolana kopi i do.

Jotjotan hita lalap di bagak ni mangkuk

inganan ni kopinta i,

di bagak ni sangkir inganan ni kopinta i,

di bagak ni galas inganan ni kopinta.

Tabo ni dai ni kopi

na diusehon sian serep ni Tuhanta jotjot gabe tahalupanhon.

Rumingkot do ngolu,

sian angka aksesoris ni ngolu.

Unang tarlalap.

Inum ma kopi mi!