MANGEBATI ANGKA DONGAN NA NI HASIHOLAN

Tanjung Uban, Minggu,11 April 2018

Tu tulang nantulang niba parjabu on:

J. Lumban Gaol/St. M. br. Simanjuntak:

Nunga tung butong hami mangan bosur minum aek sitiotio i,

Jala sagat na marlompan juhut.

Di si do gandina di si gandona, sirsir do assimna,

Di si do nang asomna, di si do daina hona do nang tabona.

    Asa dohonan ma nidok ni umpama: 

“Bagot na marhalto ni agatan di robean, horas ma antong hami na manganton, tu ganda di hamu na mangalean”. 

Sinimbur ni pangkat ma sinimbur ni hotang, ia tu si hamu mangalangka di si ma dapotan parsaulian dapotan pangomoan.

Di hamu da amang da inang na huhaholongi hami. Sidok mauliate do hami di sude pambahenanmuna denggan i, marpungu hita di bagas ni kel. J. Lumban Gaol/St. M. br. Simanjuntak. Tongtong masiaminaminan ma hamu songon lampak ni gaol masitungkoltungkolan songon suhat di robean. I pe mauliate ma di hamu sude na manghaholongi hami, di parjumpangan di ari minggu. Ala parsaoranta marhuranglobi opat taon na salpu di huria HKBP Tanjung Uban. Ro hami mangebati di ari sadari on. Asi ma antong roha ni Tuhanta pardenggan basa i dilehon ma di hita ari nauli tu joloan ni ari on.

Mauliate ma tu hamu sude: J. Lumban Gaol/St. br. Simanjuntak (Parbagas on; Pdt. L. Lumban Gaol/ br. Aritonang; St. M. Marbun br Sianturi (Leo); St. E. M. Pandiangan/ br. Siregar (Gibran); St. R. Sinaga/ br. Panjaitan (Imchal); St. D. Siregar/ br. Silalahi (Stephen); St. E. Nainggolan/ br. Situmorang, St. B. Sijabat/br. Siagian (Bendrivaldo); St. P. Simbolon/br. Sinaga (Septinius);  St. IDP. Simarmata/ br. Sihombing (Reyhan); S. Simaremare/ br. Manalu (Asri); L. Hutapea/ br. Simamora (Putra), Kel. Manik, U. Silaban/ br. Pakpahan (Ruben); AJS. Dongoran/ br. Purba (Jeremia),  M.B. Sijabat/ br. Siregar (Kelvin).

Di hamu haha angginami, boru bere dongan sahuta aleale, pariban sude hamu na huhaholongi hami. Sidok mauliate do hami di sude pambahenanmuna denggan i baik materil tarlumobi ma moril naung mangurupi hami boi antong mardalan ulaonta dohot dengan sahat tu botari on. Sahalinari elekhononnami: Masiaminaminan songon lampak ni gaol masitungkoltungkolan songon suhat di robean. I pe mauliate ma di sude hamu na manghaholongi hami, tarlumobi ma di hamu hasuhutonnami. Asi ma antong roha ni Tuhanta pardenggan basa i dilehon ma di hita ari nauli tu joloan ni ari on asa tarida holong ni roha i, na tongtong maringan di hita saluhutna.

Silaklak urukuruk tu silanlan Aek Toba, na metmet ndang marungutungut, namagodang marlas ni roha. 

Mauliate godang tu:

Kel. St. Mangapul Marbun /br. Sianturi (Leo) denggan jala sonang hami marborngin di bagasmuna.

Tuhanta ma na mamasumasu hamu saluhutna!

Horas!

MAMASUHI BAGAS

ACARA PARTANGIANGAN

MAMASUHI BAGAS

Keluarga

 J. Manullang /br. Sipayung

Sabtu, 16 Juni 2018

  

di

Jl. Kerinci Raya No. 5 Pondok Melati Indah

Jatiwarna- Bekasi

(Dongan Sahuta 

sian Batang Beruh Sidikalang 

Pajumpa di Jakarta)

 

I.       Joujou tu parsaoran (L:Liturgis; R: Ruas; K:Keluarga)

L:   Hamuna angka dongan na hinaholongan di bagasan Goar ni Tuhan Jesus Kristus, pinuji ma Amanta Debata na paborhathon jala pataruhon hita tu inganan on. Di tingki on, marpungu hita manghalashon pasupasu ni Debata mandapothon Kel. J. Manullang/br. Sipayung. Dipasupasu Debata nasida di angka ulaonna, dipasinghop angka las ni roha, tarlumobi na pauliulihon bagas on. Asa songon na nidok ni natuatua ma dohonon: Andilo nahinan hadanghadangan saonari; na pinarsinta nahinan, dapotonta ma saonari.

R:   Amen, I ma tutu

L:   Martahuak manuk mira di pogu ni alaman; sai dilehon Debata ma angka na denggan na itaparsinta, jala sai dipataridahon ma angka na jinalahan

R:   Amen, Ibma tutu

L:   Nunga bongot hita tu bagas ni Kel. J. Manullang/br. Sipayung. Hata ni Debata mandok: Molo so Jahowa na paulihon bagas, loja sambing do angka na mamandei. Antong nunga dipajongjong Debata marhite angka pande bagas on, nuaeng masuhanta ma bagas on di bagasan Goar ni Debata Ama, Anak, dohot Tondi Parbadia. Amen. Puji ma Jahowa, ale tondingku, jala nasa rohangku di bagasan mamuji GoarNa na badia i.

K:  Puji ma Jahowa, ale tondingku, jala unang tung halupahon denggan ni basaNa sudena. Mauliate ma rohanami di Ho Tuhan Jahowa. Sian Ho do nasa na adong di ngolunami. Sai pasupasu jala ramoti ma hami. Pangke ma ngolunami dohot nasa silehonlehonMi tau hasangapon di goarMu. Amen.

II.       Ibadah

1.   Marende BE. No. 14:1+2 Puji hamu Jahowa tutu BL.57 Bes=Do; 4/4

 

Puji hamu Jahowa tutu, pardengganbasa, parasiroha salelengna i,

Pardengganbasa i, parasiroha i.

Ingot tongtong ale tondingkon, sude na denggan,

Na dipasonggop  Debata tu ho. Denggan basaNa do na pangoluhon ho.

2.   Votum – Introitus - Tangiang

L:  Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on

R:   Amen

L:   Bongoti hamu ma angka bahalNa marhitehite hamauliateon, angka alamanNa marhitehite pujipujian, mauliate ma rohamuna tu Ibana, puji hamu ma goarNa

R:   Ai pardengganbasa do Jahowa, ro di saleleng ni lelengna do asi ni rohaNa, jala marsundutsundut do hasintonganNa

K:  Alai anggo ahu dohot donganhu sajabu, ingkon Jahowa do oloannami. Mauliate ma rohanami di Ho, ale Tuhan Debata. Ho do na mamasumasu ulaonnami dohot keluarganami. Ro ma Ho, ingani ma rohanami dohot bagas na pinasahatMu on, asa gabe bagas partangiangan, bagas na manghatindanghon dame dohot holong ni rohaM.

L:   Martangiang ma hita: Ale Tuhan Debata, Parasiroha na sumurung! Mauliate rohanami tu Ho alani godang ni asi ni rohaM di hami. Diurupi Ho do keluarga J. Manullang/ br. Sipayung paulihon bagas on sian na mamungka pajongjonghonsa sahat ro di nuaeng. Pujionnami ma Ho ro di saleleng ni lelengna, ala naung sun saluhutna i bahen inganan ni partangiangan dohot pamujion di goarMu. Sian Ho do dijalonasida angka silehonlehonMi, umbahen na sun bagas on. Sai asi ma rohaM, sai ro ma Ho tumopot bagas na pinajongjongMon. Sai pasupasu ma sude angka na paulihonsa. Sai parmahani ma keluarga na mangingani bagas on. Sai topot ma hami marhitehite Tondi Parbadia, asa lam hot haporseaonnami di AnakMu, Tuhan Jesus Kristus Sipalua hami. Amen.

3.   Marende BE. No. 116: 1 Ditompa Ho do au BL.243           G=Do; 4/4

Ditompa Ho do au, sondangi rohangkon

Tung basabasaMi sudena di au on

Gomgomi pamatanghu, naeng Ho do oloanku

Sai lehón ma gogongku, lomoM naeng ulaonku

Urupi, tatap au tutu, Panompa na burju

4.   Manjaha hata ni Debata:

L:   Hata ni Debata, Sijahaonta di Partangiangan on, na tarsurat di Mateus 7:24-27  Asa na umbege hatangKi jala diulahon, sipatudoson ma i tu halak na marroha, na paulihon bagasna di atas batu mamak.

R:   Ia ro pe udan potir, mangalantap pe tangkuju jala pur pe habahaba manondong bagas i, ndang na marumpak, ai batu mamak do haojahanna.

L:   Alai na umbege hatangKi hape ndang diulahon, i ma sipatudoson tu halak na oto, na paulihon bagasna di atas rihit.

R:   Dungi ro ma udan potir, mangalantap ma tangkuju, pur ma dohot habahaba manondong bagas i, gabe marumpak ma, pola tung marongso.”

L:   I do sahat na. Martua do angka na tumangihon hata ni Debata jala na umpeopsa. Amen.

 

5.   Marende SDJ. No. 714: 1 Tuhan na marmahan hami    Es=Do; 4/4               

Tuhan na marmahan hami, togu hami ruasMon

Lehon dameMi di hami, angka na hinophopMon

Tuhan Jesus, Sipalua, parmahani ruasMon

Tuhan Jesus, Siparmahan, parmahani ruasMon

6.   Tangiang Pangondian:

7.   Marende SDJ. No. 763: 1 Molo Jesus donganmi      G=Do; 4/4

Molo Jesus donganmi las roham, Jesus i Pangurupim las roham

Hot haporseaonmi, dohot pos ni rohami

Mardonganhon  Jesus i las roham

Las roham, las roham, mardonganhon Jesus i, las roham

Marsinondang ma di ho, bintang panghirimon i

Mardonganhon Jesus i, las roham.

8.   Jamita:

9.  Marende SDJ. No. 792:1... Pasupasu hami o Tuhan    D=Do; 4/2 (Pelean)

Pasupasu hami o Tuhan, sai usehon dameMi

Sai ampehon tanganMi Tuhan, lehon tu au gogoMi

Di portibi on, baen ma au Tuhan habaoran ni las ni roha

Tu na marsak i, tu na dangol i, gabe pangapuli i

Pasupasu hami o Tuhan, sai usehon dameMi

Sai ampehon tanganMi Tuhan, lehon tu au gogoMi

Di portibi on, baen ma au Tuhan monang maralohon dosa

Dibaen gogoMi, talu musu i sibolis pangago i

Pasupasu hami o Tuhan, sai usehon dameMi

Sai ampehon tanganMi Tuhan, lehon tu au gogoMi

       10. Tangiang Panutup