TERJEMAHAN NI INONGKU DO NA DUMENGGAN!

       

Opat halak amanta pandita, martaringot halobian ni angka peterjemah ni Bibel tu marragam parhataan.

·       Sada halak sian amanta pandita mandok, na malo do Ompui Nommensen manterjemahhon Bibel tu hata Batak uju i.

·     Na sada halaknari mandok, na ummalo muse ma na mambahen Bibelta i gabe marhata Batak siganup ari, momo antusan ni sundut na umposo. Ninna i.

·  Pandita na patoluhon mandok, na marhata Indonesia i do na ummura antusan! Anggo hata Batak i, bahat na so huantusi!

·   Pandita na paopathon mandok: “Na umlomo rohangku, terjemahan ni inongku do!” Nunga diterjemahkan inongku i, tu ngoluna siganup ari…ndang nango sada lipe!

BEHA BARITA NI I?

Dung sumirsir lalo na masa di Japang, pintor hobas ma angka parhobas tim penyelamat laho mangharhari angka batu dohot hau panompasan ni lalo di bagas ni sahalak ina na bajar. Sai dilului angka parhobas ma, ruangruang, laho manjalahi so tung adong bangke ni jolma na tarhapit.

Tompu ma tartilik sada halak sian parhobas i, bangke ni sada halak ina manungkup, sai hira na manghaol duguldugulna. Marsada tahi ma parhobas i. Asa, i ma dipatujolo laho harharannasida asa bolas handiton nasida bangke ni inanta i tu duru. Tung gok hamaolon do nasida laho paorot bangke ni inanta i. Ndang marhosa be, nunga ngali jala marjogal. Uju laho manghindat bangke ni inantai tim penyelamat i, sungkot ma ulos ni inanta i, Tompu marsurak ma sada halak sian parhobas tim penyelamat, “Adong sada halak dakdanak posoposo!”

Hape huroha uju marosak bagas i ala ni lalo i, na ditarehon inanta i do abarana laho manaongi dakdanak i, gabe tanggurung ni inanta i ma maropuk, anggo dakdanak i gabe dilinggomi pamatang ni inanta i.

Uju diabing parhobas tim penyelamat i, dakdanak i, jumpa nasida ma Handphone di ulos ni dakdanak i, tarsurat di handphone i: “Molo mangolu ho amang, boto jala ingot ma holong ni roha ni inongmu tu ho”. Tumatangis ma luhut na torop i, ala ni na masa i. Terjemahan ni inongku do na dumenggan!