Nikson Simangunsong: MAULIATE MA DI HAMU SALUHUTNA!

MAULIATE MA DI HAMU SALUHUTNA!

Ompungdoli ompungboru, tulang nantulang,
amangtua inangtua, amanguda inang uda, amang, inang, hahaanggi pinariboto,
namboru amangboru, dongan sahuta, pamarenta setempat,
Amang Sekretaris Jenderal HKBP Pdt. David Farel Sibuea, M.Th.,D.Min dohot inang
Parhalado ni HKBP Serbelawan
Pdt. Peterson Purba (Pdt Resort), Pdt. A. Tambunan (Uluan Huria)
Na manangianghon hami, manumpahi hami, mangurupi hami, mangapuli hami
Keluarga S. Silitonga br Lumbantobing (Ompu ni si Rachel) dohot pomparanna
di parsarimatuaon ni inanami ompung ni si Rachel boru
PAIR JULIANA BORU LUMBANTOBING
(77 TAON)
DI SERBELAWAN
Ari Minggu, 3 Februari 2019

JUJUR NGOLU
(RIWAYAT HIDUP)

Ny. Saut Silitonga – Pair Juliana boru Lumbantobing

(Ompu ni si Rachel Boru)

1. Hata Patujolo

Di hamu amanta raja, inanta soripada, Hulahulanami, Bona ni arinami, tulangnami, tulang rorobotnami, Natuatua, dongan sahuta, pangula ni hurianami, amanami inanami na liat na lolo, na marholong di roha di hami! Mauliate ma di Tuhanta Pardenggan basa i. Mauliate ma nang di hamuna na ro manopot hami di habot ni rohanami ala parsarimatuaon ni ina nami on.

Andorang so hupatolhas hami Barita Jujur Ngolu (Riwayat Hidup) ni inanami on, jumolo hami marsomba sampulu jari pasampulu sada Simanjujung, molo adong na hurang dimpos di Barita Jujur Ngolu na hupatomutomu hami on, boi ma ita padimpos, asa songon na sa sintongna.

2. Tarombo ni Ompunami na umpomparhami

1. Goar ni ompunami i ma Ompu Jumorong Silitonga, mangalap boru ni rajai Simanjuntak sian Sianjur Siborongborong. Simanjuntak sian Sianjur ma na gabe Bona ni Arinami.

2. Lima ma anak ni ompunami Ompu Jumorong Silitonga tinubuhon ni ompungboru Simanjuntak, i ma:

2.1.Daniel Silitonga mangalap boru ni raja i Pardede sian Parlombuan

2.2.Lukas Silitonga mangalap boru ni raja i Aritonang sian Pahae

2.3.Israel Silitonga mangalap boru ni raja i Simanjuntak sian Siparendean

2.4. Thomas Silitonga mangalap boru ni raja i Simanjuntak sian Sabungan ni Huta.

2.5. Jakkob Silitonga mangalap boru ni raja i Simanjuntak sian Onan Runggu.

Anggo apala na gabe ompunami i ma Israel Silitonga mangalap boru ni raja i Simanjuntak sian Siparendean, angka anakhonna tinubuhon ni ompungboru Simanjuntak i ma:

1. St. Martin Silitonga mangalap boru ni raja i Tampubolon sian Lumban Gukguk

2. Willem Silitonga mangalap boru ni raja i Pardede sian Parlombuan

3. Kepala Kampung Raja Pesta Silitonga mangalap boru ni rajai Panggabean sian Ambar Hoda

Ompungnami St. Martin Silitonga mangalap boru ni raja i Tampubolon sian Lumban Gukguk. Tampubolon ma na gabe Bona Tulangnami, tolu ma anakhonna tubu ni ompungboru, i ma:

1. Gr. Parel Silitonga mangalap boru ni rajai Hutagalung sian Tarurung

2. Esman Silitonga mangalap boru ni raja i Tambunan sian Sigotom

3. Angkus Silitonga mangalap boru ni raja i Hasibuan sian Sayur Matinggi

Gr. Parel Silitonga mangalap boru ni rajai Hutagalung sian Tarutung. Hutagalung ma na gabe Tulang di hami. Tubuna adong lima anak dohot lima boru, i ma:

1. Binsar Silitonga (Ompu Sari) mangalap boru ni rajai Tampubolon, marhuta di Bagan Batu-Riau

2. Saut Silitonga mangalap boru ni rajai Lumbantobing (Op. Ni si Rachel) sian Huta Tinggi – Laguboti i ma ina na tapaadopadop on.

3. Poltak Silitonga (+) Ndang marhasohotan

4. Polin Silitonga mangalap boru ni rajai Manurung (Ama Siska) sian Parapat

5. Ojak Silitonga mangalap boru ni rajai Sinaga sian parapat (Ama Kembar).

Lima boru tinubuhonna, i ma:

1. Emmi br. Silitonga marhuta tu marga Gultom sian Pangaribuan (Op. Putra)

2. Intan br. Silitonga marhuta tu marga Silalahi sian Serbelawan.

3. Sumihar br. Silitonga marhuta tu marga Lumbantobing

4. Dame br. Silitonga marhamulian tu marga Sitorus

5. Risma Marisi br. Silitonga marhuta tu marga Simatupang

Pinompar ni amanami Saut Silitonga tu ni boru Lumbantobing na ita paadopadop on i ma:

1. Lasma br. Silitonga marhuta tu marga Simangunsong (Ama Rachel) sian Sidikalang. Sada boru di nasida

2. Marta br. Silitonga marhuta tu marga Hutabarat (Ama Ester) sian Purwokerto. Tolu boru di nasida

3. Risdawati br. Silitonga marhuta tu marga Purba di Sindar Raya (Ama Anugerah). Sada anak dohot dua boru di nasida.

4. Mery br. Silitonga marhuta tu marga Situmorang (Ama Enjel) sian Palembang. Sada boru dohot sada anak di nasida.

5. Lina Tuti br. Silitonga. Marsangkap ma martumpol tu marga Sitanggang di ari 5 Februari 2019 on

6. Ledy br. Silitonga marhuta tu marga Manalu (Ama Evan) sian Pakkat. Dua anak di nasida

7. Lisda br. Silitonga marhuta tu marga Purba (Ama Grace) sian Sidamanik. Sada boru dohot sada anak di nasida

8. Hordi Silitonga – Dolidoli dope nasida

Pungu ma sude pinompar ni amananmi Saut Silitonga tinubuhan ni inanami br. Lumbantobing na sarimatua on:

7 boru dohot 1 anak

6 hela

13 pahompu pungu ma 27 halak

Sorang ma inanami on di ari 31 Juli 1942 jala marujung ngolu di ari 31 Januari 2019 pukul 23.45 WIB marumur 77 taon.

3. Panutup

Di hamu amanta raja, inanta soripada, Hulahulanami, Bona ni arinami, tulangnami, tulang rorobotnami, Natuatua ni huta, dongan sahuta, pangula ni hurianami, amanami inanami na liat na lolo, na marholong di roha di hami! Pamintoran di adat dohot pamintoran di uhum do hamu. Martinangi marbinege ma hamu rajanami di Jujur Ngolu ni inanami on, suang songon ni tu torop ni pinomparna. Mangelek ma hami, asa martangiang ma hamu manangiangkon sude pomparanna lumobi ma tu borunami Lina Tuti br Silitonga na marsangkap martumpol di ari 5 Februari 2019 on di HKBP Serbelawan, tiurtiur ulaon i ditumpak Tuhan i. Songon i anaknami si Hotdi Silitonga asa mangihut marhasohotan di tingkina. Nang amanami S. Silitonga ompu ni si Rachel doli pe hipashipas dungkon panadingkonon ni inanami on. Mauliate ma di Tuhanta Pardenggan basa i. Mauliate ma nang di hamuna na ro manopot hami di habot ni rohanami ala parsarimatuaon ni ina nami on. Dipasupasu Tuhanta ma nnang hamu saluhutna! Horas.