TONGKA MOLO TUNG GABE MARDOMU DI TANO RARA

TONGKA

MOLO TUNG GABE MARDOMU

DI TANO RARA

Martimpul timus ni sigaret marpior diullos alogo. Sipata tu siamun dipata tu hambirang sipata manangkok tu ginjang. Dungi lam nipis gabe mago sian parnidaan. Songon i ma sai dipangullushon ama ni Benget timbahona, dialsip diullushon, ndang sian rohana na marisap i.

Ia rohana sai tu hata ni tunggane boruna, nai Benget do. I ma taringot tu parsahiton ni tinodohonna, ama ni Martua.

Nunga dua taon lelengna nasida na so marsiantoan i, ndang hea marsisisean ala ni tano pangulaan.

Nunga marpiga bulan lelengna, ala sahitna sai peakpeak ama ni Martua di podomanna, tung so adong do mulak roha ni ama ni Benget laho mandulo anggina na marsahit i.

Alai nuaeng, sai lao rohana tu anggina, ama ni Martua i. Sai ro tu bohina bohi ni amanta na hinan natoras nasida. Hita pasunggulhon na masa i tu rohana. Alai molo diingot ibana neang ni roha ni ama ni Martua di angka panghataionna na tu ibana, sai hira na didoit do panghilalaan ni ama Benget.  

Marbonsir ma muse i sian nai Benget na sogot, andorang so borhat tu balian. 
"Apus ateatemi amang maradophon anggimi! Anju anggimi ama ni Martua i. Nunga lam posa parsahitonna. Atik boha ibana sogot, gabe panolsolion di ho?" Lambok hata ni nai Benget tu tungganedolina i.

"Boha nimmu? Laos ahu ma parjolo ro tu jabuna? Ginjang ni rohana sun tu ahu! Dibaen na mamora ibana! Loas ma ditaon!” Ninna ama ni Benget, gogo soarana.

"Toho do nidokmi amang. Songon dia ma bahenonna di tingki on molo gabe ibana na ro manghatai tu hita. Alai ndang gabe talum molo didulo ho ibana hatiha topet marsahit renge songon saonari on. Ai so ise i, mudarmu do." Diulahi nai Benget mandok manurdukhon hatana, sangkapna asa mombun roha ni ama ni Benget amanta i.

Pasipma disi! Ndang diantusi ho i. Molo dietong ibana do ahu hahana, ndang songon i leasna hatana dohot pangalahona marnida ahu. Hatana do mandok, mardomu di tano rara, diharat ama ni Benget ngadolna pola marhuratak, patuduhon hansit ni rohana.

"Ueeee.... amang. Ndang diingot ho be jamita ni pandita i. Holan holong do na boi palao sibolis. Unang oloi sibolis i maringanan jala marsaringar hatana di roham. Dia ma molo ahu on, na nialapmu do ahu. Molo ho tu ibana, sian sada tunas, sian sada siubeon. Molo diranapi ho hatangki, nauli. Molo pe ndang, mulak tu ho do alusna. Lomom ma amang." Dipalambok na Benget suarana mandok. Dungi ditadingkon nai Benget ma ama ni Benget manguduti ulaonna.

Salpu panghataion i, sai marsaringar di roha ni ama ni Benget sude nanidok ni inanta i. Sian na sogot, mulaulaon pe ibana, ianggo rohana tu hata i do. Maos ibana maradi na mambaboi haumana. Ndang ala na loja, na manginongi do rohana hata ni tungganeboruna i. "Boha ma tutu molo manang mahua anggingku ama ni Martua i. Dua do hami songon pat ni manuk, hape ndang mardomu. Hape nunga marbulanbulan naung renge sahitna, tung soada rohangku mandulo manang manise. Molo sai niingot, paet do nian angka hatahatana i, alai songon nidok ni omak ni si Benget, so tung gabe panolsolion di ahu sogot. Lao ma tahe ahu tu bagasnasida annon borngin. Molo tung pe dipalao nasida ahu, marnida di si ma i." Mulak ma roha ni ama ni Benget, mombun ma mohop ni ateatena, hibul ma di rohana na ingkon laho nama mandulo anggina, ama ni Martua. Dipahatop ibana mulak marpadot sian balian.

Dung sidung ibana na martapian. "Omak ni Benget ...! Tu son ma ho jolo inang." Songon i ma panggorana tu omak ni si Benget inantana i.

Apala aha amang? Aha naeng dohononmu umbahen pola jouonmu au tu lambungmu on? Huhut dipahundul nai Benget tondongkon ama ni Benget.

"Sai hurimangi hatami sian na sogot, sai manginongi rohangku. Atik boha tutu sogot ama ni Martua i, lao ma hita tu bagasnasida. Padimpos ma jamajamam, dok tu dakdanak i asa unang ditadingkon bagasta. Beta ma hita borhat tu bagasnasida," ninna ama ni Benget.

"Haleluya.... beta ma! Nunga singkop be ulaonhu. Hupaboa pe tu gellengta na lao hita. Borhat ma nasida tu bagas ni ama ni Martua angginasida i.

"Horas....!" Ninna nai Benget dung sahat nasida di baba pintu jabu ni ama ni Martua.

"Horas....! Bah, halak angkang boru dohot halak amang. Tu bagas ma hamu, amang!" Ninna nai Martua, minar bohina mangalusi, ditomu di baba ni pintu jabuna. Masuk ma nasida mandapothon ama ni Martua.

Peak di podomanna, mangadop tu tivi do ama ni Martua. Holan na sargang modom, ingkon dipahundul dipapodom nama laho mangan dohot laho minum. Nunga marniang hian holan holiholi nama. Lonsop nunga simalolongna. Lungun do roha ni ama ni Benget marnida anggina i.

"Horas ma, poang...!" Ninna ama ni Benget huhut dijalang, jala dipajonok tu ama ni Martua.

"Horas, ma angkang ninna..." tangis gogo ama ni Martua. Dihaol ibana leleng ama ni Benget. Rap tangis ma nasida nadua.

"Nunga boha panghilalaanmu anggi? Boha do nunga parubatonmu?" Ninna ama ni Benget huhut dilap bohina naung maraek ala ni iluna.

"Songon on ma, angkang. Pahundul ma jolo ahu, " ninna ama ni Martua tu angkangna i. Dipahundul ama ni Benget ma ibana. Dibahen mangunsande tu dorpi bantal ma holangholangna bahen pangunsandeanna.

Manghatahatai ma nasida. Godang ma angka hata na marsianjuan. Leleng nasida manghatai i. Longang do nai Martua boi songon i lelengna ama ni Martua na hundul i.

"Mauliate, ma amang, ro hamu mandulo anggimuna on. Bereng hamu ma amang, dohot angkang boru.... mansai minar jala rara bohi ni anggimuna i di haroromuna on. Na salpu i ndang hea tahan leleng hundul songon on, hape dung ro hamu gabe boi. Mauliate, ma Tuhan!" Mongkokhongkok nai Martua mandok hatana huhut marabur iluna ala las ni rohana.

"Boha i inang? Na masihol do ra marnida angkangna, haha dolim," Ninna nai Benget mengkel songon na margait.

"Toho do angkang! Ndang hea boi ahu hundul leleng songon on. Tutu do na sihol rohangku marnida hamu. Ala ni ginjang ni rohangku, maila au mangodanghu hahuranganku tu angkang. Songon na lumumbang huhilala nuaeng." Ninna ama ni Martua, manetek iluna.

"Mauliate ma di Tuhan i. Lam hiras ma ho, anggia sumuang muse panghilalaanmu," diampehon ama ni Benget tanganna tu abara ni anggina i. Manang ala ni ubat pe i, manang ala naung mardame sonang hita, jala lumobi ma ala asi roha ni Tuhan, tu ariari mangihut lam hipas ma ho.

Lam hipas do tutu ama ni Marta. Tamba ari, tamba hipasna. Parsiajaran do on tu nasida. Puas sude na di roha nasida. Roha dame do ubat. Sahit pe hape boi do malum dibahen holong dohot dame. Suang songon i do balikna, na hipas pe boi do gabe sahit molo adong partontangan di roha.

Unang ma adong hata mardomu di tano rara. Molo masa songon i, ndang tarsolsolan, ala boi patubu sahit. Mardame ma dohot roha tondi dohot badan, asa boi mardame dohot dongan tubu dohot jolma manang ise pe.

Selamat Natal 2019