ULAON PABORHATHON & PANGOJAKHONON PANDITA HKBP DAME RESORT PULO JAHE

 

PARTORDING NI

ULAON PABORHATHON & PANGOJAKHONON

PANDITA HKBP DAME RESORT PULO JAHE

 

Sian: Pdt. Timbul Golkaria br Nainggolan, M.Th.

tu: 

Pdt. Nikson Simangunsong, S.Th.

HURIA KRISTEN BATAK PROTESTAN

Distrik VIII DKI Jakarta Raya

Minggu, 23 Maret 2025

I.          PABORHATHON

 

(Di tingki marende, ro ma tu jolo Pdt. Timbul Golkaria br Nainggolan, M.Th., & Amang)

Marende BE. HKBP No. 156: 2 “Jesus Parmahan i” (BL.149)F=Do 4/4

 

Naung dipatolhas Ho hataM tu siseanMu.

Antong nasida do muse parhiteanMu.

Lao pararathon i tu liat tano on.

Ai harajaonMi naeng lam bidang tongtong.

 

(Praeses):

  

      Huria ni Tuhanta, di Minggu sadari on paborhatonta ma Pdt. Timbul Golkaria br Nainggolan, M.Th., rap dohot keluarga sian Huria Kristen Batak Protestan (HKBP) Resort Pulo Jahe on tu panghobasion na imbaru gabe Pandita HKBP Resort Metro Lampung. Pujionta do Debata, jala dohononta mauliate tu Panditanta siala pangobasionnasida saleleng di HKBP Resort Sola Gracia Cibitung on.

           

      Domu tu si, tabege ma jolo Surat Keputusan Ketetapan ni Ephorus HKBP, taringot tu nasida:

 

            MANJAHA SK EPHORUS HKBP:

 

            PABORHATHON:  (Huhut masijalangan):

   

Na mewakili Praeses (Pdt. Kamiter Hutagalung-MPSD): Hamu amang Pdt. Timbul Golkaria br Nainggolan, M.Th., nunga dibege hamu Surat Keputusan Ketetapan ni Ephorus HKBP. Hombar tu si, ahu Praeses HKBP Distrik VIII DKI Jakarta hupaborhat ma hamu, tu panghobasionmuna na imbaru di bagasan goar ni Debata Ama, dohot goar ni AnakNa Tuhan Jesus Kristus, dohot goar ni Tondi Parbadia. Sai dipasupasu Debata ma panghobasionmuna nasailaon di Huria on. Amen.

  

MARTANGIANG:   

 

Ale Tuhan Debata, Amanami na marhabangsa di banua ginjang. Nunga dipaojak Ho HuriaM di tongatonganami, jala disuru Ho do angka naposoM manghobasi huriaM i. Pujionnami do goarMu jala dohononnami mauliate tu Ho. Ai Ho do na paloashon naposoM, Pdt. Timbul Golkaria br Nainggolan, M.Th., marhobas di HKBP Resort Pulo Jahe saleleng on. Pasupasu ma panghobasion ni naposoM on jala tumpahi, asa marparbue gabe hasangapon di goarMu jala bahen las ni roha di HuriaM i. Ho ma na mandongani dohot margogoihon naposoM on, asa tulus dohot denggan mardalan nasa panghobasionna di tongatonga ni HuriaM. Marhitehite Goar ni AnakMu, Tuhan Jesus Kristus Tuhannami. Amen.

 

Marende BE. HKBP No. 121: 1  “Jesus Raja Ni Huria” (BL.97) Es=Do 3/4

(Di tingki marende, mulak ma Pdt. Timbul Golkaria Nainggolan, M.Th.,& amang tu hundulanna, dung i ro ma tu jolo Pdt. Nikson Simangunsong, S.Th., & Inang).

 

Jesus Raja ni huria na porsea na badia, pasupasu ma au on.

Sai sungguli ma rohangku mangihuthon Ho, Rajangku;

Pargogoi ma au tongtong, pargogoi ma au tongtong.

 

II.      PANGOJAKHONON

 

         (PRAESES):

 

      Huria ni Tuhanta, di ari Minggu on laos ojakhononhon do Pdt. Nikson Simangunsong, S.Th., gabe Pandita Huria Kristen Batak Protestan (HKBP) Resort Pulo Jahe Jalan KRT Rajiman Distrik VIII DKI Jakarta Raya on. Domu tu si, tabege ma jolo Surat Keputusan Ketetapan ni Ephorus Huria Kristen Batak Protestan taringot tu penempatan nasida dohot Aturan Paraturan HKBP 2002 Dung Amandemen pa-IV-hon taringot tu Ulaon ni Pandita Resort:

·         MANJAHA SK EPHORUS HKBP

·         MANJAHA AP - HKBP

         Ulaon ni Pandita Resort:

1.  Manguluhon Resort rap dohot Parhalado Resort;

2.  Manguluhon Huria sabungan ni Resort i rap dohot Parhalado Partohonan;

3.  Manguluhon rapot Resort, rapot Parhalado Resort dohot angka rapot na marrumang tirket Resort;

4.  Mamingkiri nasa na ringkot na tau pangoluhon dohot paheheon Huria dohot Parhalado na di Resort i;

5.  Maniroi Huria na masuk tu Resort i laho manggohi tanggungjawabna;

6.  Patulushon haputusan ni Sinode Godang, Rapot Majelis Pekerja Sinode, Sinode Distrik, Rapot Majelis Pekerja Sinode Distrik dohot Rapot Resort;

7.  Mangaramoti dohot maniroi parhepengon dohot arta ni Huria na masuk tu Resort i;

8.  Patupa evaluasi dohot mangalehon Laporan Pangulaon, Statistik dohot Keuangan Resort tu rapot Resort dohot tu Praeses;

9.  Mamatamatai dohot mangaradoti hasasaut ni pardalan 55% sian pelean na masuk tu ganup huria na adong di Resort sitongoson tu BPSK hombar tu naung diaturhon.

 

            PAOJAKHON:

 

Hamu amanami Pdt. Nikson Simangunsong, S.Th., nunga dibege hamu Surat Keputusan Ketetapan ni Ephorus HKBP taringot tu inganan panghobasionmuna dohot Aturan Peraturan HKBP taringot tu ulaon ni Pandita Resort. Antong na manungkun ma ahu nuaeng tu hamu,  di jolo ni Tuhanta Jesus Kristus, dohot di jolo ni angka Parhalado suang songoni angka ruas na pungu dison: Na olo do hamu ojakhononhon gabe Pandita HKBP Resort Pulo Jahe Jalan KRT Rajiman Distrik VIII DKI Jakarta on jala na olo do hamu mamelehon dirimuna mangaradoti angka ulaon i hombar tu Aturan  dohot Peraturan ni Huria Kristen Batak Protestan (HKBP)?

 

                        Molo songon i  rohamuna, dok hamu ma: 

                        (PANDITA NA NIOJAKHON):

 

      Na olo do ahu, sai didongani asi ni roha ni Debata ma ahu laho patupahon dohot patulushon saluhutna i.

 

            (Masijalangan): 

            Ahu Praeses Huria Kristen Batak Protestan Distrik VIII DKI Jakarta, di bagasan Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, hupaojak ma hamu gabe Pandita Huria Kristen Batak Protestan Resort Pulo Jahe Jalan KRT Rajiman on, sai didongani jala dipargogoi ma hamu mangulahon ulaon i asa marsanggap goarNa marhitehite panghobasionmuna. Amen.

 

            PASAHATHON TU HURIA

            (Pandita/inang na niojakhon humusor mangadop tu ruas):

 

         (Praeses): Marhite on, hupasahat hami ma Pdt. Nikson Simangunsong, S.Th., gabe Pandita HKBP Resort Pulo Jahe on dohot keluarga. Janghon hamu ma nasida di bagasan las ni roha dohot dame, gabe Pangula di Harajaon ni Debata.

  

        (Ruas): Di bagasan las ni roha dohot dame na sian Tuhanta Jesus Kristus, hujanghon hami ma hamu amang Pdt. Nikson Simangunsong, S.Th., & Keluarga di HKBP Resort Pulo Jahe Jalan KRT Rajiman Distrik VIII DKI Jakarta on. Sai dipargogoi Tuhan i ma hamu laho manguluhon dohot pahembanghon panghobasion di tongatonga ni Huria.

 

            MARTANGIANG MA HITA:  

     

      Ale Tuhan Debata Amanami, marhitehite Jesus Kristus Tuhannami, Raja jala Nampuna Huria i. Mauliate ma rohanami tu Ho jala pujionnami do goarMu, ai ndang dipaloas Ho HuriaM i so marparmahan. Alai sai dipabangkit Ho do angka naposoM na burju jala na olo suruonMu mamaritahon hataM. Nunga dipaojak Ho Pdt. Nikson Simangunsong, S.Th., marhobas di HKBP Resort Pulo Jahe Jalan KRT Rajiman Distrik VIII DKI Jakarta on. Asi ma rohaM! Lehon ma TondiM na badia i margogoihon, mamparsahalai, jala mamparbisuhi ibana, asa polin dibaritahon naposoM hataM i. Lehon nang hahipason, hatoguon, dohot hiras ni roha mangaradoti sude ulaon. Tumpahi ma saluhut na niulanasida, jala sai patubu ma hataM na binaritahonnasida, asa marparbue i di roha dohot ngolunami. Hupasahat hami  tangiangnami on tu Ho marhitehite Goar ni AnakMu, Tuhan Jesus Kristus Tuhannami. Amen.

 

·         Marende Huria BE. HKBP No. 157: 2   ‘O Tondi Parbadia i’ BL.206 Es=Do 4/4

(Di tingki marende mulak ma Pdt. Timbul Golkaria br Nainggolan, M.Th.,/amang tu hundulanna)

 

Martua do huriaM i ai na holong do rohaM i, mambaen hangoluanNa

Dilehon Ho partogi i, na mangajari sasude, pature parrohaonna

Unang hurang di huria na badia panditana, angka na burju Rohana

III. MANDOK HATA:

 

1.       Hata Partadingan sian Pdt. Timbul Golkaria Nainggolan, M.Th. & Keluarga

2.       Hata Patujolo sian Pdt. Nikson Simangunsong & Keluarga

3.       Borhatborhat dohot Panjangkonon:

a.       Mewakili Ruas

b.       Mewakili Parhalado

4.       Pasahathon cinderamata (molo rade)

5.       Bimbingan Pastoral sian Praeses na mewakili

 

IV.    PANGUJUNGI

 

            Marende BE. HKBP No. 730: 1 “Sai Patau Ma Au Tuhan”  Des=Do 6/8       

(ro ma tu langgatan Pandita na Marbaju Tohonan laho mangujungi  Parmingguon).

Jongjong

            Sai patau ma diringku ale Tuhan, papatarhon hinauliM i Tuhan,

            Suru ma tondiM i saor tu rohangki, lao papatar holongMu tu donganhi.

 

V.    TANGIANG PANGUJUNGI

 

Tangiang Pelean - Ale Amanami – Pasupasu 

Amen. Amen. Amen.