TAMPUK NI PUSUPUSU, URAT NI ATEATE

TAMPUK NI PUSUPUSU,

URAT NI ATEATE

 

N

unga lam matua ahu,

Lam sundut mata ni aringku

Mangantusi ma ho ale inang,
Mangantusi ma ho ale amang,

Palambas ma roham

Molo sap huahua mandarhi,

Molo pe pasambar solophu

Molo pe sai hudiori

Di dia hillongku?

Hape hapit do di pinggol di simajujunghi

Ingotma!

Na jolo uju hupapangkehon sipatum!

Uju hupaulakulakhon mandok sadasada hata,

Uju paapilhon sipajojoronmu,

Sipata jut roham

Tangihon ahu amongmu on
Tangihon ahu inongmu on,

Tangihon!

Unang so tangihon!

Di si hadanakonmu uju i,

Torop angka turiturian 
Na sai hupatubegehon tu ho

Laos tarpodom do ho borungku,

Peak di abinganki

Sipata huparidi ho,

Ala sai henes ho na martapian i

Sipata ingkon elekon,

Sipata ingkon panggaron,

Sipata lissingon,

Sipata gotilon,

Asa bolas ho martapian

Sipata laho panghulingkon radio,

Laho pangoluhon TV,

Laho pangoluhon komputer,

Umsigop do ho sian hami.

Unang insahi hami!
Unang leas roham
Hasianku!

Ingot ma beha amongmu 
Ingot ma beha inongmu  

Na parmudumudu ho,

Sahat tu na magodang
Magodang ho songon saonari on.

Molo so boi be hami mardalan,

Nunga telluktelluk,

Togu hami hasian.

Ingot uju sihaetehonmu,

Hutata,

Hutogu,

Hudideng,

Huompa pudi

Huompa jolo

Hutuak di abarangku

Molo sipata sibahuton nonangta,

lehon tingki di ahu laho marningot muse

Sasintongna angka sihataan i,

Sai hira na so pola ringkot be di ahu

Na rumingkot asal ma sai jonok ho di lambungki

Holan dipatangitangi ho pe ahu da hasian,

Nunga sonang panghilalaanku

Molo pe sipata sibahuton nonangta,
Lehon tingki di ahu
Laho marningot muse
Sintong ni angka sihataan i,
Sai hira na so pola ringkot be nian di ahu angka i
Na rumingkot,
Asal ma sai jonok ho di lambungki
Holan dipatangitangi ho pe ahu hasian,
Nunga sonang panghilalaanku.

Molo ditatap ho ahu naung lam matua on, 
Unang ho mabiar!

Botoma, 
Antusi ma,

songon uju ahu manogunogu ho 
Tagan posoposo dope ho,

Sai pinarsinta do ho anakku
Sai pinarsinta do ho borungku
Asa tibu magodang
Songon ulluson purapura

Songon pargodang ni assimun.
Bonggal songon Buarbuar
Tumimbona
Songon tarup ni rumah Batakta i.

Hatiha i, 
Hupatuduhon do tu ho,

Beha mangalangka,

Beha marhata,

Beha martata!

Saonari dongani ma ahu hasian,

Di hatuaonhon,

Sarihon ahu!

 

Palambas ma roham, 
Sai minar ma bohim
Mengkel martata ma ho

Huhut dok mauliate 
Tu Pardengganbasa I

Asa sonang panghilalaannami

Mengkelsuping ma 
ahu antong

Tampuk ni pusupusungku,

Urat ni ateatengki,
Hasianku!