DUNG SONANG ROHANGKU

DUNG SONANG ROHANGKU

(Buku Ende HKBP No. 213)

Philipp Paul, Bliss 1876

Horatio Gates Spafford sorang di ari 20 Oktober 1828 di luat Lansungburgh, New York. Sada halak pengacara huhut pengusaha na gabeak di luat Chicago.  Horatio Gates Spafford inantana, Anna Spafford, dohot 5 anakhon nasida (sada halak baoa dohot opat halak borua). Di taon 1860 an keluarga na bonggal na tarbarita do keluarga ni si Horatio Gates Spafford di humaliang luat Chicago. Sai mardapotdapot do parlabaan ni si Horatio Gates Spafford sian usahona reals estate di topian ni tao Michigan. Nang pe di bagasan ngolu na mamora jong, na bonggal tarbarita, parhuria na utusan do nasida di huria Presbysterian.

Di sada tingki masa ma udan na so hasaongan. Di taon 1870 uju marumur opat taon dope anakhon baoa nasida i,  masa ma sahit Begu Antuk (demam berdarah), gabe marujung ngolu ma anak nasida i. Habot situtu ma roha nasida, ala panadinghon ni anakhonnasida i. Mangihut ma muse di taon 1871 masa ma hagoran bolon di luat Chicago (Great Chicago Fire), masurbu ma luhut aset-aset real estate nasida, gabe tumpur ma usaho nasida i. Nang pe songon i, anggo amanta Horatio Gates Spafford ndang na gabe margudompong. Sai tubu dope rohana laho mangurupi angka dongan sahutana na agoan bagasna be, na pasidohot manghilalahon harugian, ala pangontak ni hagoran bolon i.

Dung lam dumenggan partingkian, marsangkap ma si Horatio Gates Spafford laho mangusung keluargana marlibur tu Eropa, songon pasonanghon roha nasida be.  Di taon 1873, sada halak parbarita na uli alealena  D. L. Moddy dohot Ira D. Sankey marsangkap patupa parrapoton ni angka parbarita na uli di Inggris, borhat ma amanta Horatio Gates Spafford dohot inanta i rap dohot boruna na opat i. Borhat ma nasida marhopal laut uap Perancis SS Vile du Havre sian New York, manuju Inggris mangalaosi samudera Atlantik. Alai tompu amanta Horatio Gates Spafford ndang boi dohot, ala urusan bisnis na mansai ringkot na so boi tadinghononsa. Holan inanta i, dohot na opat borunasida i, ma na borhat, jala mandapoti ma anggo amanta Horatio Gates Spafford.

Di borngin ni ari 22 November 1873, martumpur ma kopal laut SS Vile du Havre i, tu kopal bosi Inggris The Loch Earn. Di bagasan 12 minut, lonong ma kopal SS Vile du Havre tu laut na bagas, pola 226 halak panumpangna, padohot na opat halak boru ni  si  Horatio Gates Spafford: Annie, Maggie, Bessie dohot Taneta. Anggo inanta i, Anna Spafford malua do sian mara i, rap dohot  47 halak nari. 

Malua do si Anna Spafford  sian na masa i, jala ibana ma na patolhashon taringot tu na masa i: "Sai hira na hona ossop do huhila tu lung laut i. Pola malua borungku si Taneta sian abinganku, ala sai dipangambalhon galumbang i.” Songon i boru nasida si Maggie dohot Annie, adong nian sada halak baoa na poso laho mambuat sian kopal i. asa mumbangumbang di parhau ni kopal i.  Alai dung sai marlange tarhira 30-40 minut, gabe mapeut do nasida sian sitioponna be, gabe mate mumbang ma di laut i.

Sia ari dung na masa i, sahat ma nasida luat Cardiff, Wales, di tongos inanta Anna Spafford ma telegram tu amanta i Horatio Gates Spafford: "Saved alone. What shall I do?" (sasada ahu nama, aha ma patupaonku? aku sendiri yang selamat, apa yang harus kulakukan?)  Dihobashon  amanta Horatio Gates Spafford borhat tu Inggris laho manjumpanghon inanta i Anna Spafford.

Di pardalanan laho tu luat Inggris, dipatuduhon kapten kopal na tinompangna i ma inganan parharoman ni kopal SS Vile du Havre, mambahen laos so tarpodom  amanta Horatio Gates Spafford. Na nia lelengna sai marpingkiri sai marhosa ganjang mangarimangi angka na masa i. Di bagasan roha na mangopu digurgethon amanta i ma di sada harotas:  “When peace like a river attendeth my way, When sorrows like sea-bellows roll, Whatever my lot, Thou has taught me to say, ‘It is well, it is well with my soul!’ "It is well, the will of God be done." (Hal ini baik, kehendak Tuhan, terjadilah). Di ginjang ni kopal i ma  Horatio Gates Spafford manurathon hymne "It is well with my soul" molo pangantusion na lumambas: Jiwaku sanggup menerima (cobaan ini) manang terjemahan bebas: Jiwaku baik-baik saja (walau didera penderitaan). Di parjumpanganna dohot inanta i, Anna Spafford didok amanta i: Ndang na agoan anakhon hita on, na masitopot langkana be do pe hita on ("Kita tidak kehilangan anak-anak kita. Kita hanya berpisah dengan mereka untuk sementara.")

Diusung amanta Horatio Gates Spafford ma inanta i Anna Spafford tu Chicago, di si ma nasida manguduti ngolungolu nasida. Dipasupasuhon Tuhan i ma tolu anak muse. Parjolo di taon 1876 goarna Horatio marningot anaknasida na parjolo i. Taon 1878 sorang boru nasida si Bertha jala dua taon na mangihutna i di taon 1880, sorang ma si Grace.

Alai dung marumur 4 taon si Horatio marujung ngolu do, ala sahit Begu Antuk (demam) songon hahana uju i. Mardapotdapot na masa i.  Ndang marpiga leleng dung na masa i, dipabali huriana muse ma nasida: Ala di dok roha ni huria i, ala adong do na so suman di ngolu ni Horatio Gates Spafford, umbahen gabe masa angka na masa i.

Di bulan September 1881, borhat ma Horatio Gates Spafford mamboan keluargana gabe marhuta di Jerusalem. Dibahen nasida ma punguan nasida margoar "American Colony." Manghobasi angka namarhahurangan, angka na pogos, na marsahit, na sopot so marama so marina, na so mardihadiha. Mangulahon holong ni Tuhan Jesus.  Novelis Swedia, Selma Ottiliana Lovisa Lagerlof manurathon parngoluon nasida on marhite novelna "Yerusalem." Di pudian ni arina, manghamonanghon hadiah Nobel. 

When peace, like a river, attendeth my way,

When sorrows like sea billows roll,

Whatever my lot, 

Thou has taught me to say,

It is well, it is well, 

with my soul.

It is well, with my soul.

It is well, with my soul.

It is well, it is well,

with my soul.

Though Satan should buffet, though trials should come,

Let this best assurance control

That Christ has regarded 

my helpless estate,

And hath shed His own blood 

for my soul.

My sin, oh, the bliss of this glorious thought!

My sin, not in part but the whole

Is nailed to the cross, and I bear it no more,

Praise the Lord, praise the Lord, oh my soul.

And Lord haste the day when my faith shall be sight,

The clouds be rolled back as a scroll,

The trump shall resound, and the Lord shall descend,

Even so, it is well with my soul.

It is well, with my soul. It is well, with my soul.

It is well, it is well, with my soul.

Sian marpiga sumber

ni gurithon marhata Toba.

Nick Hajut 2018