MANGHOBASI PUNGUAN NI OMPU RAJA NATANGKANG OMPUSUNGGU

PARTONDING NI

PARTANGIANGAN BONA TAON 2018

PUNGUAN NI OMPU RAJA NATANGKANG OMPUSUNGGU

BORU, DOHOT BERE SE-JABODETABEK

Di Villa Junior Cisarua Puncak Bogor

24-25 Maret 2018

 

Tema: “…Ingot hamu ma holong ni roha sama dongan Kristen! Masijolojoloanan ma hamu masipasangapan!”

 (Roma 12:10)

I.             PANGARADEON (Protokol)

II.          IBADAH

1.      Invocatio

L    : Tabe ma di hamu! Nunga salpu sada taon, tung godang do itajalo angka pengalaman na denggan dohot pengalaman na buruk di taon naung salpu i, i do na laho bohal jala parsiajaranta laho mangeahi taon na imbaru. Nunga bongot hita tu taon na imbaru, na dibasabasahon Debata tu hita. Antong ale dongan, itapungka ma taon on di bagasan las ni roha dohot hamauliateon godang tu Debata.

H   :  Mauliate ma di Ho ale Debatanami, na mangalehon ngolu na tipak di bagasan taon na imbaru on.

L    :  Dijou Debata do hita laho marsaor dohot Ibana di bagasan partangianganta on, i ma Partangiangan Bona Taon 2018 PUNGUAN NI OMPU RAJA NATANGKANG OMPUSUNGGU BORU, DOHOT BERE SE-JABODETABEK, asa ita jalo sian Ibana hagogoon laho mandalani ariarinta di taon na imbaru on. Antong itapuji jala itapasangap ma Ibana marhite na marende hita.

2.      Marende BE. No. 15: 1-2 Aut na saribu hali ganda BL.103 F=Do

Aut na saribu hali ganda saringar ni soarangki

Naeng nasa gogo bahenonku, mamuji Debatanta i.

Paboa las ni rohangki hinorhon ni pambaenNa i.

Tung sura sahat soarangku tu ujung ni portibi on,

Naeng nasa jolma haraonku mamuji Debata tongtong

Tama do nasa hosangki hubaen pasangap Tuhan i.

3.      Votum~Introitus~Tangiang

L    : Marhitehite Goar ni Debata Ama!

H   :  Na manompa jala na manjadihon hita dohot sude nasa na adong di portibi on.

L    :  Dohot Goar ni AnakNa Tuhan Jesus Kristus!

H   :  Na mangalehon hangoluan na imbaru di bagasan ngolunta, na manobus hita sian sude dosanta marhitehite mudarNa. Ibana do Tuhanta na ro tu portibi on, asa malua hita sian gomgoman ni sibolis, nang na ro paduahalihon di ari sogot, laho manguhumi sude nasa na marhosa.

L    :  Dohot goar ni Tondi Parbadia!

H   :  Ibana do na padomuhon hita di bagasan parsaoranta sadari on. Ibana do na mangajari hita jala na mangalehon apulapul di bagasan hagogotan. Jala Ibana do na manogunogu dohot mangalehon gogo na imbaru di bagasan ngolunta.

L    :  Na manompa langit dohot tano on!

H   :  Amen, hupuji ma goarMu ale Tuhan!

L    :  “Unang hamu mabiar!” ninna Jahowa sitompa saluhut. Ida ma, Ahu paluahon bangsongKu sian tano tungkan habinsaran dohot sian tano tungkan hasundutan ni mata ni ari

H   :  Marende BE. No. 69:1 Ungkap bahal na ummuli BL.84 C=Do

1.  Jesus sai urupi hami, dohot di taon baru on
Paimbaru gogonami, mangihuthon Ho tongtong
Pasupasu ma muse, na porsea sasude

L    :  Ai laho do songot pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tu si.

H   :  Marende BE. No. 69:2 Ungkap bahal na ummuli BL.84 C=Do

         2.  Pingkiranku ulaonku, tau pasangap Ho ma i
Dungo manang modom ahu,

             Ho tongtong di lambungki
Nang lao ruar masuk pe, Ho ma donganki muse.

L    :  Di jolo ni angka ari on, pagomos hamu ma tanganmuna. Ai bahenonku ma hamu gabe pasupasu tu saluhut bangso, asa gabe bangsongku nasida, jala Ahu gabe Debata nasida. Songon hamu di bagasan Ahu, songon i ma nang nasida di bagasan Ahu.

L    :  Martangiang ma hita! (ida Agenda)

4.      Koor:

5.      Marende SDJ. No. 712: 1 Togu au ale Jahowa G=Do

Togu au ale Jahowa di dalan na rodop on

Ho do na tongtong satia togu au na gale on.

Sagusagu hangoluan sai pabosur tondingkon

Sai pabosur tondingkon!

6.      “Pangkirimon di taon na imbaru”

L    :  Molo tarimangi pardalananta di bagasan taon naung salpu i, godang situtu do angka na masa manipat angka ari. Mardalan hita di bagasan ngolu na gok ondamondam, gok biar rohanta mangadopi sude angka na masa. Adong dope hasonangan di ari marsogot? Manang na ingkon mangolu do hita di bagasan hatahutan!

H   :  Ale Tuhan, asi ma rohaM, togu ma hami saleleng di hasiangan on.

L    :  Gabe sejarah ma taon 2017 di tongatonga ni bangsonta. Bencana alam, kekacauan dohot sude angka na masa, gabe sada gambaran di hita asa tapareahi dirinta ganup. Nang pe songon i, sipata lomos do rohanta, aha do na naeng masa di tongatonga ni bangso Batak songon i di bangso Indonesia na huhaholongi hami on?

H   :  Ale Tuhan, asi ma rohaM, togu ma hami saleleng di hasiangan on.

L    :  Ndada holan i tahe, hatahuton, ganggu dohot biar, sahat do tu tongatonga ni punguan. Torop do jolma i na gabe lam mandao sian tongatonga ni parsaoran di huria, dohot angka punguanpunguan pasada roha. Hasadaon, dame, las ni roha songon i nang parlinggoman ndang be dipataridahon ngolu ni jolma i.

H   :  Ale Tuhan, asi ma rohaM, togu ma hami saleleng di hasiangan on.

                        …………… hohom ……………

L    :  Gabe sorminan ma taon 2017 naung salpu laho mangeahi taon 2018 on. Molo biar rohanta laho mandalani ariarinta, ta ingot ma, adong do Ama na di banua ginjang na mandok hataNa tu hita “Unang mabiar hamu!”, ai ndang pasombuonNa hita mardalan sasadanta. Asal ma hohom hamu, Debata do marporang maralohon sude angka musunta.

H   :  Mauliate ma ale Tuhan, di sude denggan basaM dohot panoguonMu.

L    :  Gabe sorminan ma taon 2017 naung salpu laho mangeahi taon 2018 on, asa lam marsada hita laho patupahon angka na denggan di tongatonga ni parngoluon on, lumobi di PUNGUAN NI OMPU RAJA NATANGKANG OMPUSUNGGU BORU, DOHOT BERE SE-JABODETABEK. Patupahon kerjasama na denggan di tongatonga punguan dohot keluarganta be. Kepedulian sosial, ido na dipangido, asa tarida kemajuan, sejahtera dohot hasintongan di tongatonga ni masyarakat na merdeka.

H   :  Mauliate ma ale Tuhan, di sude denggan basaM dohot panoguonMu.

L    :  Gabe sorminan ma taon 2017 naung salpu laho mangeahi taon 2018 on. Asa tarida hasadaon di tongatonga ni punguan laho patuduhon haporseaon na togu di bagasan ngolunta. Marsada ma pangurus ni punguan dohot ruasna, laho patupahon las ni roha di tongatonga ni punguan. Ai saluhutna do hita tarjou, ndada holan pangurus, alai sude do hita dipangido Debata gabe siulahon na denggan.

H   :  Mauliate ma ale Tuhan, di sude denggan basaM dohot panoguonMu.

7.      Koor:

8.      Marende SDJ. No. 707: 1 Hagogoon dohot apulapul Es=Do

Hagogoon dohot apulapul do dilehon Tuhan i tu au

Ganup ari au ditogutogu, ganup tingki diondingi au.

Ai hombar tu lomo ni rohaNa do dilehon Tuhan i tu au

Ro marsorin arsak las ni roha haporseaonhu di patau.

9.      Epistel Kolose 3: 12-17

L:   Hata ni Debata Epistel di Pesta Bona taon sadari on, i ma natarsurat di Kolose 3: 12-17. Onpe, hamu angka naung pinillit ni Debata, angka na badia jala hinaholongan, solukkon hamu ma parasirohaon situtu, habasaron, haserepon, lambok dohot lambas ni roha!

H:  Masipauneunean jala masisesaan dosa ma hamu, jumpa marpangkurangi na sada dompak donganna; songon panesa ni Kristus di hamu, songon i ma nang hamu!

L:   Alai diginjang ni saluhutna i: I ma haholongon ni roha i; ai i do rahutrahut ni nasa harimpason.

H:  Jala dame ni Kristus i ma mangarajai di bagasan rohamuna, ai tusi do hamu dijou di bagasan sada daging. Gabe parroha mauliate ma hamu!

L:   Gugun ma hata ni Kristus maringanan di tongatongamuna; mardongan sandok hapistaran ma hamu masiajaran jala masipaingotan marhitehite angka ende psalmen, endeende pujipujian dohot ende partondion; endehon hamu ma Debata di bagasan rohamuna marroha hamauliateon!

H:  Jala na siulaon, manang di hata, manang di pambahenan, saluhutna i ma marhitehite Goar ni Tuhan Jesus, huhut mandok mauliate tu Debata Ama marhitehite Ibana.

L:   I do sahatna. Martua do na tumangihon hata ni Debata jala naumpeopsa.

H:  Amen.

10.  Tangiang Pangondian: St. Donald Ompusunggu

11.  Marende SDJ. No. 677: 1 Mansai lambok G=Do

Mansai lambok Tuhan Jesus manjou manjou ho dohot au

Ida Ibana paima haroromu mulak ma ho dohot au

Antong sai ro ma ho, angka na sorat sai ro ma ho.

Mansai lambok Tuhan Jesus manjou, pardosa mulak ma ho.

12.  Jamita: Rom 12: 10 (Pdt. Nikson Simangunsong)

    Hendaklah kamu saling mengasihi (filos) sebagai saudara dan saling mendahului dalam memberi hormat. 

    Ingot hamu ma holong ni roha sama dongan Kristen! Masijolojoloanan ma hamu masipasangapan! (Rom 12:10)

     Nunga marujung sada bagian na balga di surat ni si Paulus na tu halak Rom, i ma bagian teologis-soteriologis (bdn.1-11). Di bagian i, dipajojor do angka na pinatupa ni Debata bahen haluaon ni jolma (indikatif yang besar). Dung i, mamungka ma na imbaru, bagian etis (bdn.12-16), i ma na taringot tu sipatupaon ni jolma na hombar tu ulaon haluaon naung pinatupa ni Tuhan i (imperatif yang besar). Di tingki i ndang denggan dope pardomuan ni halak Kristen tu angka na di balian; tu halak Jahudi dohot tu na leban, laos songon i tu pamarenta. Dihasogohon halak do na porsea i, dirajumi songon musu ni masyarakat dohot bangso. Gabe dihosomi ma nasida, dilelei, dipaburuburu jala dipaporsukporsuk. Menyikapi saluhutna i, ingkon buaton ni na porsea i do keputusan etis na hombar tu hata ni Debata. Taringot tusi ma na pinasingothon ni si Paulus di turpuk on.

     Di bona ni bindu on, dipanghulingi si Paulus do huria i songon sesama dongan. “Angka dongan,” digoar do nasida angka na hinaholongan (Gr. agapeetoi, beloved) di bagasan holong ni roha na sian Debata (Gr. agapee, love) Ringkot do i, ai lam tu ‘maolna’ do sipasingotna i. Songon i pe i, naeng ma hilalaon ni huria i paboa sipaingot sian na manghaholongi do i tu na hinaholonganna.

    Pasahat DAGING (soma) bahen pelean na mangolu, na badia, na hinalomohon ni Debata; i do hadaulaton ni na marroha (ibadahmu yang sejati).

      Hamu angka dongan sahaporseaon di bagasan Goar ni Tuhanta Jesus Kristus!

   Adong ma sada lapo tuak inganan ni na sai angka supir Angkutan Kota (Angkot). Na so panagaman pasoal ma di sada meja di lapo i, sian na minum tuak, di buat ma gitar na gantung di dinding di lapo i, diantukhon tu meja huhut mangondamondam donganna na pasual i. Gasagasaon do amanta parlapo i, alai ndang dia tardokna. Dung di tolai angka dongan, so ma parsualon nasida, jala mulak be. Anggo gitar na niantukhon di pedan i, nunga matapor.

    Dung salpu marpiga leleng, sai tong digantunghon parlapo i gitar naung ponsa i di dinding ni lapo i. Huuji ma manungkun parlapo i. Ai beasa sai gantunghononhon gitar naung matapor on? Ai nunga diganti hamu indi on? So boi be pangkeon?

     Ai ndang gitar i berengonmu bere! Na tarsurat di gitar i do jahaonmu! Aha huroha tarsurat di gitar i? ningku. Sigatma! Ninna amanta i. Hubuat ma tutu gitar i, jala hujaha ma suratna: GITAR SIPOHOLON. Ai aha huroha Sipoholon on? Tong dope so mangertos ho, ninna. Asa botoonmu bere, ompungku do na mambahen gitar on. Hape diantukhon baoa i ma holiholi ni ompungku. Ninna amanta i, huhut peret iluna!

   Aha do na nidokni angka dongan? Boi do parngoluongku marungkil, manang hancur, boi do pamatanghon hansitan, marsahit, baroon, boi do bohingkon ndang bagak…Alai na tarsurat di son, na mambahen on ise do? Tuhanta do na tarsurat di son. Made in JHWH. “Dung i mangkuling muse ma Debata: Tole ma, itatompa ma jolma, tumiru rupanta, tudos tu pangalahonta…” (1 Musa 1:26). Songon di ape rupanta, songon dia pe pardompahanta, songon dia hahuranganta didok deba, songon dia pardosaonta. Tuhanta do sitompa hita, goar ni Tuhanta do na tarsurat di ngolunta. Napinangolu ni Debata do hita.

    Di turpuk on Apostel Paulus nunga lam matua. Pamerenganna nunga lam rambon, gogona nunga lam suda, jala sahit adong di pamatangna didok hira suga di bagasan daging. Dipaubathon ndang olo malum, ditangianghon, gariada di dok Debata: “Tuk ma asi ni rohangku di ho; ai di hagaleon do sun timbul hagogoon. Asa tagonan ma hupapujipuji diringku di bagasan angka hagaleonku, asa songgop tu ahu hagogoon ni Kristus.” (2 Kor.12:9). Ingkon boanonmu mate do sahitmi.

 Angka dongan molo lam matua danging aha ma siulahononhon? Unang songon na jotjot itabege: Eeeee, Asal naung matua do ho! Ninna. Nunga bau tano! Nunga jonok RIP! Hape panghataionmu ramba hira cencen, hira tenejer rambasese.

Tu sude halak Rom, hidupmu yang singkat adalah siasia molo gabe pendendam, molo angka pargulahonon haramunon. Di ayat 11 di dok Apostel Paulus: Oloi hamu ma Tuhan i

Torop natuatua ni halak Batak maol mate, ala sai disolsoli ngoluna ndang denggan pamangkena di haposoonna. Sai naeng putaronna rohana jarum jam ni ngoluna asa adong tingkin laho mulak paturehon angka na niulana na jolo. I do alana laho mate sai mongkikongkik…aha dohononmu bapa, aha dohononmu inong? Ninna anakhonna. Alai sai mongkikongkik…hape mandok pasahat jolo mahafhu si sianu…garar jolo utanghu tu sianu….bahat angka pangalaho na so sanga beres, ndang sanga dipature…

Hamu angka dongan seangnai ngolunta na holan sahali on molo ita pangke gabe ngolu kebencian, gabe ngolu na ramun…Olo hamu ma Tuhan i…Laho mangarade jamita on, hujaha sian bagian tangiang ni Madam Theresia: Saya yakin setiap kali kita berdoa, Tuhan melihat ke tapak tanganNya di bagian mana nama kita terukir…Molo martangiang hita manang di dia pe, pintor dibereng Tuhanta Jesus do di tapak tanganNa. Tangiang ndang holan sekedar pangidoan i. Alai na martangiang hita, i ma pasahathon ngolunta di tangan ni Debata. Beha do ngolunta on tapasahat tu tangan ni Debata. Alanii, ganup martangiang hita, dohonon ni Debata ma, nunga di tanganku ho amang, nunga di tanganhu ho inang! Dohonon ni Debata ma, pangido ma inang, pangido ma amang ai nunga di tanganku ho, lehononku ma. Tangiang adalah Ketika kita menempatkan hidup dan kehidupan kita di tapak tangan Tuhan. Beha do hita manuru halak na so pasahathon ngoluna tu tangan ni Debata martangiang? Alanii tangiang nii manihai do, manguhumi songon tangiang ni Parise. Buku Ende 487 Sipartangiang, i ma halak napasahathon sandok ngoluna tu tangan ni Debata. Secantik apapun kita. Sejelek apapun kita di tangan ni Debata do hita. I do umbahen na didok Paulus Unang ma marpangansi holong (AGAPE). Unang segai holong AGAPE ni Debata di bagasan Jesus Kristus. Di ayat 10: Dos do hata holong dipangke. Alai anggo di hata Gorik ayat 10 hata PILOS (Pardonganon) do dipangke. Molo adong holong ni rohanta di parhahamaranggion STORGE do dipangke. Ingkon holong Agape dohot paturehon holong PILOS dohot holong STORGE-NTA. Ingkon pinaborhat holong agape ni Debata na dibagasan Jesus Kristus do hita mangulahon pardonganon dohot parhahamaranggionta, mangulahon bisnista, mangulahon usaho, mangulahon sude aktivitas naeng ma nirahut ni holong agape ni Debata na di bagasan Jesus Kristus. Amen.

13.  Papungu Pelean

L    :  Tapapungu ma peleanta songon parbue ni haporseaonta, huhut marningot sude denggan basa naung tajalo sian Debata. Taingot ma hata ni Debata na tarsurat di Rom 11:36 na mandok: Ai sian Ibana do saluhutna ro, marhitehite Ibana jala marhapatean tu Ibana do saluhutna i! Di Ibana ma hasangapon salelenglelengna! Antong di bagasan las ni roha, tapasahat ma peleanta marhitehite ende pujian.

H   :  Marende SDJ. No. 691: 1 –Hupasahat ma tu Jesus Es=Do

Hupasahat ma tu Jesus saluhutna ngolungki

Roha nang pambahenanku, saluhutna tingkingki

Ref.      Hupasahat ma tu Jesus, saluhutna diringki

            Hupasahat ma tu Jesus, saluhutna ngolungki.

Pangkeonku ma tanganku, mangula lomoNa i,

Langka nang simanjojakku, mangihuthon Tuhanki.

Ref.      Hupasahat ma …

Nang pamereng ni matangku, mandompakkon Jesus

Soara ni pamanganku, mamuji goarNa i.

Ref.      Hupasahat ma …

Dung huida Tuhan Jesus, hutundalhon dosangki,

Lohot rohangki tu Jesus, sipalua tondingki

Ref.      Hupasahat ma …

Tarhalomong do rohangku dipandok ni Tuhanku,

Aleale ni Tuhanku, au di goar Jesus i.

Ref.      Hupasahat ma …

14.  Parsuruon

L    :  Debata parasiroha jala pardenggan basa i ma na paborhathon hita laho marhobas di ragam ni angka pangulaonta di taon 2018 on. Ndang tarula hamu agia aha, anggo so mardonganhon ahu, ninna Tuhan i. antong jalo hamu ma lombulombu haporseaon i, haintopan hamu do marhite sian i sude sumbia api ni parjahat i. Jangkon hamu ma nang tahuluk haluaon, dohot podang ni tondi, ima hata ni Debata.

H   :  Gomos do ditiop rohangku, ndang tarbahen sirang hita sian holong ni roha ni Debata, na di bagasan Kristus Jesus Tuhanta i, ai Ibana do na maniop ahu di bagasan ngolungku.

L    :  Antong, binsan sadihari dope, taulahon ma na denggan tu saluhut halak, asa ndada be hita na mangolu nuaeng, alai Kristus do na mangolu di bagasan hita. Asa marparange na denggan hita di bagasan ngolunta.

15.  Tangiang Panutup dohot Pasupasu

L    :  Ale angka dongan, tongkinnari, simpul ne ma partangianganta sadari on, alai pos ma rohanta, anggo asi ni roha ni Debata, hot do i ro di saleleng ni lelengna. Debata do na mandongani ahu, Debata do na mandongani hamu, Debata do na mandongani hita saluhutna.

H   :  Pos do rohanami, Jahowa do na mandongani hami, patariparhon hami, ruas PUNGUAN NI OMPU RAJA NATANGKANG OMPUSUNGGU BORU, DOHOT BERE SE-JABODETABEK mandalani taon 2018 naung pinasahat ni Debata tu hita.

L    :  Molo pos do rohanta dipandonganion ni Jahowa, jaloonta ma pasupasuNa di tongatonga ni ulaonta, di tongatonga ni keluarga, di tongatonga ni lingkunganta, songon i nang di tongatonga ni bangsonta. Ai di dok do dihataNa i: “Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate”.

H   :  Sai saut ma na pinarbagaMi ale Tuhan, jaloon nami ma gogo sian Ho, di na mandalani taon 2018 on hami. Sai pasupasu ma hami, keluarga nami, lingkungan nami songon i nang bangso nami, laho patulushon lomo ni rohaM di tongatonga ni portibi on.

L    : Antong tatangianghon ma peleanta….rap mandok ma hita tangiang Hatopanta i; Ale Amanami…(jalo hamu ma pasupasu sian Debata): ….

H         :           Marende “Amen, amen, amen”